كّالو زهرك زهر يهرس لحجرْ

هي قلة عقل و نقصان نظرْ

كّزركّو الشوكة في خيط ظّْفيرهْ

ملّي كنت صغيرهْ

لموها ف صريرة

دفنوها كبل ل فجر

كندير نكّعَّد وتادي

مالي والي لا تالي

كلشي جفرْ

حيت بويا كان شريفْ ووالي

يركبْ على عودُه ويْشالي

ويعيط بعيوطو :واهيا حمرْ..

تّي تعالي

نركّب بتكحيلة زينة

وسالف مطلوق

من قبله لبحرْ

وفوق راسي صينيّة

عامرَ لوز وتمرْ

كيشافوني قومان الشرّْ

هذا يغمزْ

وهذا يهمزْ

كالو باقي لّ جاي يكحُزْ

بويا صْكرْ

كيشاف الجماعة دارو بيا

حتى الفقيه كفرْ

هذا ينتف

وهذا يكحُشْ

كالو باقي جاي لِّ يهبشْ

واش بقا فِ الكّاعة ماتنهبو الجماعة



جيت نّفّسْ على مابيّ

, كالو ولّيه مضرورهْ

جيت ناخد حقي,

كالو لساني به المرورهْ

زرْكّو دموعي

توسدت الشوك ليلي ونهاري

بردو عليّ ضلوعي

طار نعاسي

ما لقيت باش نغطي راسي

نفضت علي تّْراب وشمّرت عْلَ ذراعي

وشكيت حالي لربي لعالي

شحال مَن عزيز صار حريرو بالي

شحال من عزيز صار حريرو بالي..



الكاتب : بهيجة بنار | بتاريخ : 2013-11-23